मधेश प्रदेशकै राजधानी जनकपुरमा रहेको मधेश स्वास्थ्य विज्ञान प्रतिष्ठान मा अध्ययनरत विद्यार्थीहरू चरम अव्यवस्था, लापरवाही र आधारभूत सुविधाको अभावविरुद्ध आक्रोशित बनेका छन्। विद्यार्थीहरूले शैक्षिक तथा भौतिक पूर्वाधार सुधारको माग गर्दै प्रशासनसमक्ष १९ बुँदे संयुक्त निवेदन बुझाएका छन्।
विद्यार्थीहरूको आरोप अनुसार प्रतिष्ठानमा सामान्य शैक्षिक वातावरणसमेत सुनिश्चित हुन सकेको छैन। कक्षाकोठामा पर्याप्त व्यवस्थापन छैन, प्रोजेक्टर तथा इन्टरनेट सेवा प्रभावकारी छैन, स्वच्छ खानेपानीको अभाव छ भने पुस्तकालय व्यवस्थापन पनि अस्तव्यस्त रहेको गुनासो गरिएको छ। शौचालय सरसफाइ कमजोर रहेको, छात्राहरूका लागि सेनिटरी प्याडको व्यवस्था नभएको, गर्मी मौसममा एसी नचल्ने तथा फर्स्ट एड सेवा प्रभावकारी नरहेको विषय पनि निवेदनमा उल्लेख गरिएको छ।
यति मात्र होइन, यातायात सुविधा र चमेना गृहजस्ता आधारभूत आवश्यकतासमेत व्यवस्थित नभएको भन्दै विद्यार्थीहरूले संस्थाको व्यवस्थापनमाथि गम्भीर प्रश्न उठाएका छन्। Practical कक्षा तथा Field Exposure नियमित रूपमा सञ्चालन नभएको, परीक्षा समयमा नहुने र नतिजा प्रकाशनमा अत्यधिक ढिलाइ हुने गरेको आरोपसमेत विद्यार्थीहरूको छ।
विद्यार्थीहरूले पटक–पटक मौखिक तथा लिखित रूपमा ध्यानाकर्षण गराउँदा पनि प्रशासन मौन बसेको आरोप लगाएका छन्। “स्वास्थ्य जस्तो संवेदनशील क्षेत्रको जनशक्ति उत्पादन गर्ने संस्था स्वयं अव्यवस्थित हुनु लाजमर्दो अवस्था हो,” भन्दै विद्यार्थीहरूले आक्रोश व्यक्त गरेका छन्।
विद्यार्थीहरूको चेतावनी छ— यदि तत्काल समस्या समाधानतर्फ प्रशासन गम्भीर नभए थप सशक्त आन्दोलन, तालाबन्दी तथा सडक संघर्षका कार्यक्रम घोषणा गर्न बाध्य हुनेछन्। अहिलेको अवस्था हेर्दा प्रतिष्ठानभित्रको अव्यवस्था केवल शैक्षिक समस्या मात्र नभई विद्यार्थीहरूको मानसिक स्वास्थ्य र भविष्यसँग खेलबाड भएको टिप्पणीसमेत हुन थालेको छ।
Discussion about this post