माध्यमिक शिक्षा परीक्षा (एसईई) आज बिहीबारदेखि देशभर एकैसाथ सुरु भएको छ। राष्ट्रिय परीक्षा बोर्डले परीक्षा सञ्चालनसँगै उत्तरपुस्तिका परीक्षण कार्य पनि आजैदेखि सुरु गर्ने जनाएको छ भने वैशाख मसान्तसम्म नतिजा सार्वजनिक गर्ने तयारी गरिएको छ।
यस वर्ष एसईई परीक्षामा देशभरबाट ५ लाख १२ हजार ४ सय २१ विद्यार्थी सहभागी भएका छन्। परीक्षाका लागि देशभर १ हजार ९ सय ६६ परीक्षा केन्द्र निर्धारण गरिएको छ भने केन्द्राध्यक्ष, निरीक्षक, कर्मचारी र सुरक्षाकर्मीसहित करिब ७३ हजार जनशक्ति परिचालन गरिएको छ। परीक्षा सकिएको विषयको उत्तरपुस्तिका तीन दिनभित्र सम्बन्धित केन्द्रमै परीक्षण गर्ने व्यवस्था मिलाइएको राष्ट्रिय परीक्षा बोर्डले जनाएको छ।
यसैबीच पर्सा जिल्लामा पनि एसईई परीक्षा शान्तिपूर्ण रूपमा सुरु भएको छ। जिल्लाबाट यस वर्ष १० हजार ७०३ विद्यार्थी परीक्षामा सहभागी भएका छन्। जिल्लाका १५३ विद्यालयका विद्यार्थी सहभागी भएका हुन्, जसमा ७० सामुदायिक र ८३ संस्थागत विद्यालय रहेका छन्।
परीक्षाका लागि पर्सामा २७ वटा परीक्षा केन्द्र तोकिएको छ। तीमध्ये १४ वटा ग्रामीण क्षेत्रमा र १३ वटा सहरी क्षेत्रमा रहेका छन्। परीक्षा व्यवस्थापनका लागि जिल्लामा १ हजार ३०४ जना जनशक्ति परिचालन गरिएको शिक्षा विकास तथा समन्वय इकाइ पर्साले जनाएको छ।
Discussion about this post