पर्साको पोखरिया नगरपालिका अन्तर्गत बैरिया गाउँमा आज आयोजित निःशुल्क स्वास्थ्य शिविरमा ५६ जनामा मोतियाबिन्दुको समस्या फेला परेको छ। लायन्स क्लब अफ बिरगंज परिवार, लायन्स क्लब अफ पोखरिया तथा लायन्स क्लब अफ बिरगंज प्रभुको संयुक्त आयोजनामा सम्पन्न कार्यक्रममा मोतियाबिन्दु छनोटसँगै सुगर र ब्लड प्रेसर परीक्षण गरिएको थियो।
छनोट भएका बिरामीहरूको यही जेठ ९ गते वीरगञ्ज सामुदायिक आँखा अस्पतालमा निःशुल्क शल्यक्रिया गरिने आयोजकले जनाएको छ।
कार्यक्रममा गाउँ–गाउँमा राज्यको स्वास्थ्य सेवा पुग्न नसकिरहेका बेला सामाजिक संस्थाहरूले जनताको आँखा जोगाउने अभियान चलाउनु सकारात्मक भए पनि ग्रामीण क्षेत्रमा आधारभूत स्वास्थ्य सेवाको अभाव अझै भयावह रहेको देखिएको छ।
कार्यक्रमको अध्यक्षता लायन्स क्लब अफ पोखरियाका अध्यक्ष लायन नेजामुद्दिन समानीले गर्नुभएको थियो भने डिष्ट्रिक्ट गभर्नर इलेक्ट राम बिहारी पाण्डे प्रमुख अतिथिको रूपमा उपस्थित रहेका थिए। कार्यक्रममा सांसद रामाकान्त प्रसाद चौरसिया, डा. लक्ष्मी थापा, लायन नरोत्तम पाण्डे, लायन सरिता सिंह तथा लायन आशा चौहानलगायतको सहभागिता रहेको थियो।
बिरगंज सामुदायिक आँखा अस्पताल र प्रभु अस्पतालका चिकित्सकहरूको सहभागितामा सम्पन्न शिविरले ग्रामीण भेगका नागरिकलाई प्रत्यक्ष राहत दिएको स्थानीयले बताएका छन्।
Discussion about this post