पर्सा – जिल्ला प्रशासन कार्यालय पर्सा मा कार्यरत प्रशासन अधिकृत बिनय कुमार गुप्ता माथि संचारकर्मीमाथि दुर्व्यवहार गरेको गम्भीर आरोप लागेको छ। सरकारी कार्यालयभित्रै भएको भनिएको उक्त घटनाले अहिले पत्रकारिता क्षेत्र, सेवाग्राही तथा सर्वसाधारणबीच व्यापक चर्चा र आक्रोश उत्पन्न गरेको छ।
प्राप्त जानकारी अनुसार जनताको समस्या, गुनासो तथा सेवा प्रवाहको अवस्थाबारे जानकारी लिन एक संचारकर्मी जिल्ला प्रशासन कार्यालय पुगेका थिए। सोही क्रममा प्रशासन अधिकृत गुप्ताले ती संचारकर्मीमाथि आक्रामक व्यवहार गर्दै घाँटी समातेर कार्यालय बाहिर निकालेको आरोप लगाइएको छ। प्रत्यक्षदर्शीका अनुसार कार्यालय परिसरमै भएको उक्त घटनाले केही समय तनावपूर्ण अवस्था समेत सिर्जना गरेको थियो।
घटनापछि अन्य पत्रकार तथा संचारकर्मीहरूले घटनाबारे बुझ्न र प्रशासन अधिकृतसँग प्रतिक्रिया लिन खोजेका थिए। तर, आरोपित अधिकृतले कुनै स्पष्ट जवाफ नदिएको तथा पत्रकारहरूसँग समेत असहयोगी व्यवहार गरेको बताइएको छ। यस घटनापछि पत्रकारहरूबीच आक्रोश बढेको छ भने सरकारी कर्मचारीको जिम्मेवार आचरणमाथि गम्भीर प्रश्न उठेको छ।
स्थानीय सेवाग्राहीहरूले पनि प्रशासन अधिकृत गुप्ताको व्यवहारप्रति असन्तुष्टि व्यक्त गरेका छन्। उनीहरूका अनुसार उक्त अधिकृतको व्यवहार यसअघि देखि नै सेवाग्राहीहरूप्रति कठोर, अभद्र तथा दबाबमूलक रहँदै आएको छ। सामान्य कामका लागि कार्यालय पुग्ने नागरिकहरू समेत पटक-पटक अपमानजनक व्यवहार भोग्न बाध्य भएको गुनासो सेवाग्राहीहरूको छ।
सरकारी कार्यालय जनताको सेवा गर्ने थलो भए पनि पर्सा जिल्ला प्रशासन कार्यालयमा भने कर्मचारीकै व्यवहारका कारण सेवाग्राहीहरू त्रसित बन्नुपर्ने अवस्था रहेको स्थानीयको आरोप छ। पत्रकारमाथि कार्यालयभित्रै भएको भनिएको दुर्व्यवहारले अभिव्यक्ति स्वतन्त्रता, प्रेस स्वतन्त्रता तथा नागरिक अधिकारमाथि नै चुनौती खडा गरेको भन्दै विभिन्न क्षेत्रबाट आलोचना सुरु भएको छ।
यस घटनाबारे सम्बन्धित निकायले निष्पक्ष छानबिन गरी सत्यतथ्य सार्वजनिक गर्नुपर्ने माग उठ्न थालेको छ। साथै सरकारी पदमा बसेका व्यक्तिले जनप्रतिनिधि, पत्रकार तथा सर्वसाधारणसँग मर्यादित व्यवहार गर्नुपर्ने आवाज समेत बलियो बन्दै गएको छ।
Discussion about this post