सप्तरीको विष्णुपुर गाउँपालिका–७ हुँदै प्रसिद्ध छिन्नमस्ता भगवती मन्दिर जाने मुख्य सडक पाँच वर्षदेखि अलपत्र अवस्थामा रहेपछि स्थानीयवासी आन्दोलित भएका छन्। राजविराज–छिन्नमस्ता सडकखण्ड अन्तर्गत विष्णुपुर क्षेत्रको सडक निर्माणमा ढिलासुस्ती भएको भन्दै स्थानीयले ठेकेदारको ट्रिपर तेर्साएर सडक अवरुद्ध गरेका छन्।
स्थानीयका अनुसार सडक डिभिजन कार्यालय लहान र निर्माण कम्पनीको लापरवाहीका कारण वर्षौंदेखि सडक निर्माण अधुरै छ। कतै हिलो, कतै धुलोका कारण सर्वसाधारण, विद्यार्थी, बिरामी र तीर्थयात्रीलाई आवतजावतमा निकै समस्या भइरहेको छ।
यो सडक राजविराजबाट छिन्नमस्ता भगवती मन्दिर जाने प्रमुख धार्मिक मार्गसमेत भएकाले यसको दयनीय अवस्थाले स्थानीय तथा भक्तजनलाई सास्ती भइरहेको स्थानीयहरूको गुनासो छ। वर्षायाममा हिलाम्मे र सुख्खायाममा धुलाम्मे सडकका कारण स्वास्थ्य र दैनिक जीवनमा समेत असर परेको उनीहरूले बताएका छन्।
स्थानीयवासीहरूले अब आश्वासन नभई तत्काल सडक निर्माण कार्य सम्पन्न गर्न सम्बन्धित निकायसँग माग गरेका छन्। समयमै काम सुरु नभए थप कडा आन्दोलन गर्ने चेतावनी समेत दिएका छन्।
Discussion about this post