अधिकृत नआउँदा मधेसका पालिकामा बेथिति, निमित्तकै भरमा सेवा

सङ्घीय मामिला तथा सामान्य प्रशासन मन्त्रालयले उपसचिवहरूको सरुवा सूची सार्वजनिक गरे पनि मधेसका केही स्थानीय तहमा प्रमुख प्रशासकीय अधिकृत अभावको समस्या ज्यूँका त्यूँ रहेको छ।

पर्साको पोखरिया र बहुदरमाईसहित बारा, रौतहट, सर्लाही र महोत्तरीका विभिन्न नगरपालिकामा लामो समयदेखि निमित्त कर्मचारीकै भरमा प्रशासन सञ्चालन भइरहेको छ।

सरकारले पटक–पटक अधिकृत खटाए पनि उनीहरू कार्यालय पुगेको केही समयमै सरुवा माग्दै फर्किने क्रम देखिएको छ। स्थानीय स्तरको अव्यवस्था, जनप्रतिनिधिको दबाब तथा विगतका कामकारबाहीका कारण उत्पन्न कानुनी जोखिमका कारण कर्मचारी टिक्न नसकेको बुझिएको छ।

यसले ती पालिकामा वित्तीय अनुशासन कमजोर हुँदै बेरुजू बढिरहेको छ। प्रशासन सुधारको चर्चा भइरहेका बेला समेत यस्तो अवस्था कायम रहनु सरकारका लागि चुनौती बनेको छ।