नवनिर्वाचित सांसदको शपथ आज हुँदै

नवनिर्वाचित प्रतिनिधिसभा सदस्यहरूको पद तथा गोपनीयताको शपथ आज अपराह्न २ बजे सिंहदरबारस्थित नवनिर्मित बहुउद्देश्यीय हलमा हुने भएको छ। शपथ समारोहको सम्पूर्ण तयारी पूरा भएको सङ्घीय संसद् सचिवालयले जनाएको छ।

प्रतिनिधिसभाका ज्येष्ठ सदस्य अर्जुननरसिंह केसीले सांसदहरूलाई शपथ गराउने कार्यक्रम रहेको सचिवालयका प्रवक्ता एकराम गिरीले जानकारी दिएका छन्। राष्ट्रपति रामचन्द्र पौडेलले यसअघि केसीलाई ज्येष्ठ सदस्यका रूपमा शपथ गराइसक्नुभएको छ।

सचिवालयका अनुसार ४७ जना सांसदले नेपालीबाहेक अन्य भाषामा शपथ लिने तयारी गरेका छन्, जसमा १७ जनाले मैथिली भाषामा शपथ लिनेछन्। सांसदहरूलाई आवश्यक कागजातसहित तोकिएको समयभन्दा दुई घण्टा अगावै उपस्थित हुन अनुरोध गरिएको छ।