राष्ट्रिय स्वतन्त्र पार्टी (रास्वपा) का वरिष्ठ नेता तथा भावी प्रधानमन्त्रीका उम्मेदवार बालेन शाहले शहिद दिवसको अवसरमा शहीदहरूको बलिदान स्मरण गर्दै सुशासन र भ्रष्टाचारमुक्त राज्य निर्माणको जिम्मेवारी वर्तमान पुस्ताको काँधमा आएको बताएका छन्।
शाहले शहिद दिवसका अवसरमा सार्वजनिक गरेको सन्देशमा राणा शासनविरुद्ध संघर्ष गर्ने गंगालाल श्रेष्ठ, दशरथ चन्द, धर्मभक्त माथेमा र शुक्रराज शास्त्रीको ८५ वर्षअघि भएको हत्या स्मरण गर्दै त्यसपछि पनि राज्य जनताको बन्न नसकेको उल्लेख गरेका छन्। उनले दशकौँमा व्यवस्था पटक–पटक फेरिए पनि सत्ताको चरित्र नफेरिएको टिप्पणी गरेका छन्।
उनका अनुसार शहीदको बलिदानपछि पनि नेपाली जनताले निरन्तर संघर्ष गर्नुपरेको छ र धेरैले ज्यान गुमाए पनि शहीदका सपना पूरा हुन सकेका छैनन्। पछिल्लो समय भदौमा भएको ‘जेन्जी आन्दोलन’ का क्रममा सुशासन र भ्रष्टाचार अन्त्यको मागसहित शान्तिपूर्ण आन्दोलनमा उत्रिएका युवाहरूले समेत ज्यान गुमाउनुपरेको घटनालाई उनले दुःखद उदाहरणका रूपमा प्रस्तुत गरेका छन्।
शाहले लामो समयदेखि जरा गाडेर बसेको भ्रष्टाचार अन्त्य गर्दै सुशासन कायम गर्नु, राज्यका निकायमा मौलाएको दलीयकरण हटाई राज्यलाई पारदर्शी र जवाफदेही बनाउनु अहिलेको प्रमुख दायित्व भएको बताएका छन्।
उनले अब शहीदका बलिदानलाई केवल स्मरणमा सीमित नराखी उनीहरूको सपना साकार पार्ने बाटोमा अघि बढ्नुपर्नेमा जोड दिएका छन्। “अब फेरि कसैले शहीद बन्न नपरोस्,” भन्दै उनले सुशासनयुक्त र भ्रष्टाचारमुक्त नेपाल निर्माणका लागि सामूहिक प्रतिबद्धताको आह्वान गरेका छन्।
सन्देशको अन्त्यमा शाहले सम्पूर्ण ज्ञात तथा अज्ञात शहीदहरूप्रति भावपूर्ण श्रद्धाञ्जली अर्पण गरेका छन्।
Discussion about this post