११ कार्तिक काठमाडौं ।
पूर्वप्रधानमन्त्री तथा नेकपा (एकीकृत समाजवादी) का अध्यक्ष माधवकुमार नेपाल का सम्पूर्ण सुरक्षाकर्मीहरू गृह मन्त्रालयले फिर्ता गरेको छ। गृहमन्त्री ओमप्रकाश अर्यालको निर्देशनमा मंगलबारदेखि यो निर्णय कार्यान्वयन गरिएको हो।
गृह मन्त्रालयका अनुसार, भ्रष्टाचार मुद्दामा धरौटीमा छुटेका नेपाललाई पूर्वप्रधानमन्त्रीको हैसियतमा दिइँदै आएको १६ जना सशस्त्र प्रहरी र २ जना नेपाल प्रहरी सुरक्षाकर्मी फिर्ता बोलाइएका छन्। यससँगै नेपाल अहिले व्यक्तिगत सुरक्षाविहीन भएका छन्।
मन्त्रालयका एक उच्च अधिकारीका अनुसार, हाल सबै पूर्वप्रधानमन्त्री र भूतपूर्व उच्चपदस्थ व्यक्तिहरूका लागि एकरूप सुरक्षा मापदण्ड लागू गर्ने नीति अन्तर्गत यो कदम चालिएको हो। उनका भनाइमा, केपी शर्मा ओली र पुष्पकमल दाहाल (प्रचण्ड) का पनि मापदण्डभन्दा बढी सुरक्षाकर्मी फिर्ता बोलाइएका छन्। अबदेखि पूर्वप्रधानमन्त्रीहरूलाई कानुनी मापदण्डभित्र मात्र सुरक्षा सुविधा प्रदान गरिने बताइएको छ।
नेपालमाथि पदको दुरुपयोग र अनियमितता सम्बन्धी आरोपमा विशेष अदालतमा भ्रष्टाचार मुद्दा चलिरहेको छ। उनी हाल धरौटीमा रहेका छन्।
यसअघि, सरकारले गठन गरेको सुरक्षा मूल्यांकन समितिले अत्यधिक सुरक्षाकर्मी परिचालन र स्रोतको दुरुपयोग रोक्ने उद्देश्यसहित पूर्वपदाधिकारीहरूको सुरक्षा पुनःसमायोजन गर्न सिफारिस गरेको थियो।
राजनीतिक विश्लेषकहरूका अनुसार, सरकारले यो कदममार्फत “कानुनी समानता र उत्तरदायित्वको सन्देश” दिन खोजेको देखिन्छ। तर नेकपा (एस) निकट स्रोतहरूले भने यस निर्णयलाई राजनीतिक प्रतिशोधको रूप मा व्याख्या गरेका छन्।
Discussion about this post