प्रतिनिधिसभाको सभामुख पदमा राष्ट्रिय स्वतन्त्र पार्टी (रास्वपा) का सांसद डा. डोलप्रसाद (डीपी) अर्याल निर्विरोध निर्वाचित भएका छन्। उनकाे औपचारिक घोषणा आगामी आइतबार बस्ने प्रतिनिधिसभा बैठकमा गरिनेछ।
सभामुख पदका लागि आज बिहान ११ बजेदेखि दिउँसो २ बजेसम्म मनोनयन दर्ता खुला राखिएको थियो। तोकिएको समयमा अर्यालको एकल उम्मेदवारी दर्ता भएपछि नियमावली अनुसार उनलाई निर्विरोध सभामुख घोषणा गरिने व्यवस्था छ।
प्रतिनिधिसभामा रास्वपा दुई तिहाइ बहुमतमा रहेको हुँदा प्रतिपक्षी दलहरूले उम्मेदवारी दर्ता गरेका छैनन्। २७५ सदस्यीय संसद्मा रास्वपाका १८२ सांसद छन् भने अन्य दलहरूमा नेपाली कांग्रेस ३८, नेकपा एमाले २५, नेपाली कम्युनिस्ट पार्टी १७, श्रम संस्कृति पार्टी ७ र राप्रपा ५ सांसद रहेका छन्।
सभामुख चयनसँगै उपसभामुखको निर्वाचन प्रक्रिया अगाडि बढ्नेछ। संविधानअनुसार उपसभामुख फरक दल र फरक लिंगको व्यक्ति हुनुपर्छ। निर्वाचित सभामुख राष्ट्रपति समक्ष शपथ लिनेछन् भने उपसभामुख सभामुखको उपस्थितिमा शपथ लिने व्यवस्था छ।
हाल उपसभामुख पदमा कुन दलको प्रतिनिधि हुने भन्ने विषयमा छलफल जारी छ। संवैधानिक परिषद्का सदस्यको रूपमा उपसभामुखको भूमिका अन्य संवैधानिक निकायहरूको सिफारिस प्रक्रियामा पनि असर गर्ने अपेक्षा गरिएको छ।
Discussion about this post