पाकिस्तानको निर्वाचन आयोगले वार्षिक सम्पत्ति तथा दायित्व विवरण समयमै नबुझाएका राष्ट्रिय र प्रादेशिक सभाका १५२ जना सांसदको सदस्यता निलम्बन गरेको छ। आयोगले निर्वाचन ऐन, २०१७ को धारा १३७ अनुसार तोकिएको समयसीमा उल्लङ्घन गरेको ठहर गर्दै उनीहरूलाई कारबाही गरेको हो।
आयोगका अनुसार सांसदहरूले आफ्नै, जीवनसाथी तथा आश्रित सन्तानको सम्पत्ति विवरण प्रत्येक वर्ष बुझाउनुपर्ने कानुनी व्यवस्था छ। जनवरी १५ भित्र विवरण पेश नगरेका सांसदलाई विवरण नबुझाएसम्म कुनै पनि संसदीय गतिविधिमा सहभागी हुन नपाउने गरी निलम्बन गरिएको भारतीय पत्रिका ट्रिब्यून ले जनाएको छ।
निलम्बित सांसदहरूमा राष्ट्रिय सभा, सिनेट तथा चारै प्रदेश सभाका सदस्यहरू रहेका छन्। प्रदेशअनुसार हेर्दा पंजाब सभाबाट ५०, सिन्धबाट ३३, खैबर पख्तुनख्वाबाट २८ र बलोचिस्तानबाट ७ जना सांसद निलम्बनमा परेका छन्।
निर्वाचन आयोगले गत वर्ष पनि यही कारण देखाउँदै १३९ सांसदको सदस्यता निलम्बन गरेको स्मरण गराउँदै कानुनको पालना गर्न सबै जनप्रतिनिधिलाई सचेत गराएको छ।
Discussion about this post