मौसममा आएको परिवर्तनसँगै आज र भोलि देशका विभिन्न क्षेत्रमा वर्षा, हिमपात र तीव्र हावाहुरीको सम्भावना रहेको छ। मौसम पूर्वानुमान महाशाखाले यसको प्रभावबाट जोगिन सर्वसाधारणलाई सतर्क रहन अनुरोध गरेको छ।
महाशाखाका अनुसार कर्णाली र सुदूरपश्चिमका पहाडी तथा हिमाली क्षेत्रमा भारी वर्षा र हिमपात हुन सक्छ। यसले चिसो बढाउने र दैनिक जनजीवनमा असर पार्ने सम्भावना रहेको छ।
त्यस्तै, लुम्बिनी प्रदेशका दाङ, नेपालगञ्ज लगायत तराई क्षेत्रमा तीव्र गतिमा हुरी चल्ने अनुमान गरिएको छ। पूर्वी नेपालका विराटनगर, धनकुटा र धरान आसपासका क्षेत्रमा भोलिसम्म ११९ किलोमिटर प्रतिघण्टाको वेगमा हावाहुरी चल्न सक्ने चेतावनी दिइएको छ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले हावाहुरीका कारण रुख ढल्ने, घरका संरचना क्षतिग्रस्त हुने तथा विद्युत् र सञ्चार सेवा अवरुद्ध हुन सक्ने भएकाले विशेष सावधानी अपनाउन आग्रह गरेको छ।
प्राधिकरणले अनावश्यक यात्रा नगर्न, सुरक्षित स्थानमा बस्न, घरका झ्याल–ढोका मजबुत राख्न, ग्यास तथा अन्य इन्धन बन्द गर्न र कमजोर संरचना तथा विद्युत् तारबाट टाढा रहन सुझाव दिएको छ। साथै मौसमसम्बन्धी अद्यावधिक जानकारी नियमित रूपमा हेर्न पनि अनुरोध गरिएको छ।
Discussion about this post