पर्सा क्षेत्र नम्बर २ अन्तर्गत वीरगन्ज–१९ बिन्दवासनी बारवामा राष्ट्रिय स्वतन्त्र पार्टी (रास्वपा) का उम्मेदवार सुशील कानुले सोमबार घरदैलो कार्यक्रम सम्पन्न गरेका छन्।
स्थानीय जेष्ठ नागरिक, जेन्जी युवा र महिला सहभागी कार्यक्रममार्फत मतदातासँग प्रत्यक्ष संवाद गर्दै कानुले आफ्नो एजेन्डा प्रस्तुत गरे।
घरदैलोमा स्थानीयले वर्षायाममा नदीबाट आउने बाढीले खेतीयोग्य जग्गामा हुने क्षति, बेरोजगारी र सीप अभावका समस्या उठाएका थिए। कानुले मतदातालाई आश्वासन दिँदै, निर्वाचित भए यी समस्यालाई संसदमा उठाउने र दीर्घकालीन समाधान खोज्ने प्रतिवद्धता व्यक्त गरे।
साथै उनले बेरोजगारी समाधानका लागि स्थानीय युवाहरू र महिलाका लागि रोजगार सिर्जना, सीप तालिम र आयआर्जनका अवसर उपलब्ध गराउने योजना अघि बढाउने बताए। कृषि उत्पादन बढाउने, मलखाद समयमै उपलब्ध गराउने र किसानको जीवनस्तर उकास्ने विषयलाई आफ्नो मुख्य प्राथमिकतामा राखेको उनले स्पष्ट पारे।
स्थानीयहरूले उम्मेदवार कानुको योजना र प्रतिबद्धतामा उत्साह व्यक्त गर्दै आगामी निर्वाचनमा समर्थन दिने संकेत दिएका छन्।
Discussion about this post