चितवन र पर्सा राष्ट्रिय निकुञ्जलाई एउटै ब्लकका रूपमा समेटेर सञ्चालन गरिएको बाघ गणनाको दोस्रो चरणको काम पूरा भएको छ।
पुस ३ गतेदेखि सुरु भएको गणनाअन्तर्गत दोस्रो चरण सम्पन्न भएसँगै निकुञ्ज क्षेत्रमा जडान गरिएका क्यामेरा ट्रयाप संकलन गर्ने कार्य सुरु गरिएको छ।
निकुञ्जका सूचना अधिकारी अविनाश थापा मगरका अनुसार दोस्रो चरणको गणनामा १३ वटा क्याम्प स्थापना गरी करिब १ सय ५० जना तालिमप्राप्त गणक परिचालन गरिएको थियो। सौराहा, खगेन्द्रमल्ली, लोथर–प्रतापपुर, बोटे सिमारा, स्वमेश्वर, बगई, अम्बुवा हुँदै सिकारी बाससम्मका क्षेत्रलाई समेटेर क्यामेरा जडान गरी बाघको उपस्थिति अभिलेख गरिएको हो।
चितवन–पर्सा ब्लकमा कुल ९ सय ५८ वटा ग्रिड बनाएर गणना भइरहेको छ। हाल ती क्षेत्रहरूमा जडान गरिएका क्यामेरा क्रमशः हटाइँदै तथ्याङ्क प्रशोधनको तयारी थालिएको निकुञ्ज प्रशासनले जनाएको छ।
यससँगै बाघको मुख्य बासस्थान मानिने बाँके, बर्दिया र शुक्लाफाँटा राष्ट्रिय निकुञ्जमा पनि समानान्तर रूपमा बाघ गणना जारी छ। करिब तीन महिनाको अवधिमा देशव्यापी बाघ गणना सम्पन्न गर्ने लक्ष्य रहेको छ।
नेपालमा हरेक चार वर्षमा बाघ गणना गरिँदै आएको छ। सन् २०२२ मा गरिएको पछिल्लो गणनाअनुसार देशभर ३ सय ५५ वयस्क बाघ रहेका थिए।
उक्त गणनामा चितवनमा १ सय २८, बर्दियामा १ सय २५, बाँकेमा २५, पर्सामा ४१ र शुक्लाफाँटामा ३६ वटा बाघ फेला परेका थिए।
Discussion about this post