हुलाकी राजमार्गअन्तर्गत सिरहा र धनुषा जोड्ने कमला नदीको पुल निर्माण १४ वर्षपछि अन्तिम चरणमा पुगेको छ। लामो समयदेखि अलपत्र परेको पुलको बाँकी काम तीव्र रूपमा अघि बढाइएको छ र आउँदो चैतभित्र निर्माण सम्पन्न गर्ने लक्ष्य राखिएको छ। पुलको लम्बाइ ४ सय ६९ मिटर रहेको छ।
ऊर्जा, जलस्रोत तथा सिँचाइ, भौतिक पूर्वाधार तथा यातायात र शहरी विकासमन्त्री कुलमान घिसिङले गएको मङ्सिर ५ गते पुलको स्थलगत अनुगमन गर्दै निर्माण कार्य तत्काल अघि बढाएर छिटो सम्पन्न गर्न निर्देशन दिएका थिए। त्यसपछि निर्माण कार्यले केही गति लिएको जनाइएको छ।
२०६८ साल जेठमा २४ करोड ९१ लाख रुपैयाँ (भ्याटसहित) मा पप्पु लुम्बिनी जेभीसँग ठेक्का सम्झौता भएको यो पुल २०७१ साल मङ्सिरमै सम्पन्न हुनुपर्ने थियो। तर समयमै निर्माण नहुँदा ठेक्काको म्याद सात पटकसम्म थपिँदै आएको छ। पछिल्लो पटक थपिएको म्याद गएको असारमा सकिएपछि फेरि आउँदो असारसम्म म्याद थप प्रस्ताव गरिएको छ ।
पुल नबन्दा वर्षौँदेखि स्थानीय बासिन्दाले सास्ती खेप्दै आएका छन्। सवारीसाधनलाई लामो र वैकल्पिक रुट प्रयोग गर्नुपर्दा समय र खर्च दुवै बढेको छ। तराई–मधेशको लाइफ लाइन मानिने हुलाकी राजमार्गको महत्वपूर्ण खण्डमा पर्ने कमला पुल समयमै सम्पन्न नहुँदा यस क्षेत्रको आवागमन र विकासमा असर परेको स्थानीयको गुनासो छ।
निर्माण सम्पन्न भए हुलाकी राजमार्गको यो खण्ड सहज बन्दै सिरहा–धनुषा आवतजावत उल्लेख्य रूपमा सुधार हुने अपेक्षा गरिएको छ।
Discussion about this post